ھەپتىدە بىر كىتاب

From Uyghurpedia- Uyghur Énsiklopédiyisi
Jump to: navigation, search

Uyghur Énsiklopédiyisi ئۇيغۇر ئېنسىكلوپېدىيىسىگە ئىئانە قىلىڭ

ھەپتىدە بىر كىتاب

تەييارلىغۇچى :فاتىمە سەيياھ

Kitab300.jpg


7- كىتاب

بۈيۈك مۇتەپەككۈرلار

جۇلىئان باگگىنى ۋە جېرىمى سىتەڭرۇم.

250 بەتلىك بۇ كىتابتا ئارستوتىلدىن تارتىپ تاكى نوئام چومىسكىغە بولغان غەرب مۇتەپەككۇرلىرى قىسقىچە تونۇشتۇرۇلغان، 2500 يىللىق غەرب پەلسەپە تارىخىنى ئازدۇر-كۆپتۇر ۋاراقلاش بىلەن بىرگە، ئوخشىمىغان ئېدىيە ئېقىملىرىنىڭ مەنبە ۋە راۋانلىرى بىلەن تونۇشۇپ چىقالايمىز. نوئام چومىسكى ئامىرىكىدا ياشايدىغان ھازىرقى زامان مۇتەپەككۇرى، ئۇنىڭ "زىيالىلارنىڭ بۇرچى" نامىدىكى ئىككى ماقالىسى ئىنتايىن كۈچلۈك ۋە چوڭقۇر يېزىلغان. بۇ كىتابنىڭ تەھرىرى جۇلىيان باگگىنى بولسا ھازىرقى زامان ئىنسانلىرىنى پەلسەپە ئىلمىگە تونۇشتۇرۇشتا ئىنتايىن مۇھىم رول ئويناۋاتقان بىر شەخس، ئۇنىڭ كىتابلىرى مەيلى پەلسەپىگە يېڭى قىزىققۇچىلارغا بولسۇن ياكى چوڭقۇرلاپ شۇڭغۇيدىغانلارغا بولسۇن ماس كېلىدۇ.

تۆۋەندە بۇ كىتابنىڭ پ د ف نۇسخىسىنىڭ ئۇلانمىسى بېرىلدى، پۈتۈن نۇسخسىنى چۈشۈرۈپ ئوقۇيالايسىز.

Great Thinkers A-Z

Editor(s): Julian Baggini, Jeremy Stangroom

بۈيۈك مۇتەپەككۈرلار


6- كىتاب

نىكولا تېسلانىڭ غەزىنىسى

تەبىئى پەنلەرگە قىزىقىدىغان ئوقۇرمەنلەردىن تېسلانى بىلىدىغانلار ئاز ئەمەس، تېسلا دېگەن ئىسىم بولۇپمۇ يېقىنقى يىللاردا ئامېرىكىلىق ئېلون ماسىكنىڭ 'تېسلا' نامىدىكى شىركىتى ياكى ماشىنا ھەۋەسكارلىرىغا تونۇش بولغان تېسلا ماركىلىق ماشىنا بىلەن تېخىمۇ يېقىن ئاڭلىنىشى مۇمكىن.

ئۇنداقتا تېسلا زادى كىم؟ ئۇنىڭ ئېدىسون بىلەن بولغان مۇناسىۋىتى قانداق بولغان؟ تېسلانىڭ قانداق كەشپىياتلىرى بار؟ بۇ سىرلىق كىشىنىڭ ئەسلى ماقالىلىرى قانداق؟

بۇ سوئاللار ۋە ئۇنىڭدىنمۇ كۆپ جاۋابلارغا قىزىقىدىغانلارغا ئۆتكەن ئەسىردىكى ئەڭ ئەقىللىق ئىنسان نىكولا تېسلانىڭ بۇ كىتابىنى ئوقۇپ چىقىشىنى تەۋسىيە قىلىمىز.


5- كىتاب


خولىرا يىللىرىدىكى ئاشىقلىق


ئاپتورى گەبرىيىل گارچىيا ماركۇز

نوبىل ئەدەبىيات مۇكاپاتىغا ئېرىشكەن كولۇمبىيەلىك يازغۇچى. ئۇنىڭ باشقا كىتابلىرىدىن 'يۈز يىل غېرىپلىق'، 'گۆرۈگە ئېلىنىش' قاتارلىق ۋەكىل خاراكتىرلىك ئەسەرلىرى بار.

خولىرا يىللىرىدىكى ئاشىقلىقنى تەۋسىيە قىلىش سەۋەبىمىز بولسا كىتابنىڭ ۋەقەلىك بايان ئۇسۇلىنىڭ ئالاھىدە ئىكەنلىكى ۋە كىتابتا تەسۋىرلەنگەن ئاشىقلىقنىڭ بىز نورمالدا 'ئاشىقلىق' دەپ تونۇيدىغان ھادىسىدىن تولىمۇ پەرقلىق ئىكەنلىكىدە.

كىشىلەر كۆپىنچە ھاللاردا داغدۇغىلىق سۆزلەر، ئىرماش ـ چىرماش ۋەقەلىكلەر ۋە سىرلىق تۇيۇلىدىغان بايانلاردىكى ھېكايە رومانلارنى ئېسىل دەپ قارىشى مۇمكىن. ئەمما ماركۇزنىڭ بۇ رومانىدا داغدۇغىلىق سۆزلەر يوق، تولا مۇرەككەپ سىرلىق ۋەقەلىكلەرمۇ ئۇچرىمايدۇ، مۇھەببەتنى بىرلا ئادەمگە سادىق بولۇش ۋە ئۆزىنى بىر ئۆمۈر 'پاك' ساقلاش دېگەندەك ئەنئەنىۋى ئاشىقلىقنىمۇ تەرغىپ قىلمايدۇ.

ئەكسىچە ئىككى ياشنىڭ ئەللىك يىللىق ئۆز ئالدىغا ئۆتكەن مۇستەقىل ئىككى ھاياتىنى پاراللىل تەسۋىرلەش ئارقىلىق، ئۇلارنىڭ يېرىم ئەسرلىك بىر ـبىرى بىلەن پەقەتلا ئالاقە قىلمىغان ئەمما ھاياتىنىڭ ئاخىرىدا بىرگە بولىدىغان مۇھەببىتىنى تەسۋىرلەيدۇ.

بۇ كىتاب ئادەمنى غەلىتىلا بىر قىزىقتۇرالايدىغان ئالاھىدىلىككە ئىگە ، ئوقۇپ ئوقۇپ ئەمدى ھېكايە قىزىقىغا چىقىدىغان بولدى دەپ كىرىشىپ قالىسىزيۇ، ھېكايىنىڭ قىزىق يېرىنى بىلىپ ـ بىلمەيلا ئوقۇپ بولغىنىڭىزنى تۇيۇپ قالىسىز.

كىتابنىڭ باش قەھرىمانى كېلىشكەن ئەمەس، باتۇر قەھرىمانمۇ ئەمەس، بايمۇ ئەمەس، قولىدىن ئىش كېلىدىغانمۇ ئەمەس، بىرلا قىز بىلەن باغلىنىپ ئۆتىدىغان ۋاپادار كىشىمۇ ئەمەس.

ئەكسىچە بۇ باش قەھرىمان فىلورىنتىنو ئارىزا ئورۇق ، ۋىجىك، كىسەلچان، سەت ۋە نامرات بىرياشتىن باشلىنىپ، يەنە بىر باش قەھرىمان فېرمىنا دازانى بىر ئۆمۈر ياخشى كۆرۈپ، نۇرغۇنلىغان كەچۈرمىشلەرنى باشتىن كەچۈرۈپ ئەڭ ئاخىرىدا بىر كېمىدە ئۆزىنىڭ ئاشىقى فېرمىنا بىلەن بىرگە ھايات كەچۈرىدۇ.

بۇ كىتاب تولىمۇ رېئال ۋە گۈزەل يېزىلغان كىتاب، ھاياتلىق پەردازلانمايدۇ، ئوقۇسىڭىز ھاردۇقىڭىز چىقىدۇ.

تۆۋەندە بۇ كىتابنىڭ پ د ف نۇسخىسىنىڭ ئۇلانمىسى بېرىلدى، پۈتۈن نۇسخسىنى چۈشۈرۈپ ئوقۇيالايسىز.

Love in the times of Cholera By Gabriel Garcia Marquez

خولىرا يىللىرىدىكى ئاشىقلىق


4- كىتاب

451 فارىنخايىت


ئاپتورى رەي بېرەدبېرى

بۇ كىتاب ئامېرىكىلىق يازغۇچى رەي تەرىپىدىن يېزىلغان بولۇپ، كىتابتا كىشىلەرنى بىخۇدلاشتۇرۇش ئۈچۈن بارلىق كىتابلارنى كۆيدۈرۈپ، كىشىلەرنىڭ ئۆيلىرىگە كامىرا ئورنىتىپ، ھەرىكەتتىن تارتىپ ئېدىيەگىچە كونتىرول قىلىمەن دەيدىغان جاھىل ۋە دېكتاتۇرا بىر دۆلەتنىڭ ئەھۋالى بايان قىلىنغان.

فارىنخايىت 451 ئوتنىڭ يەنى كىتابلارنى كۆيدۈرۈشكە نەق ماس كېلىدىغان ئوتنىڭ تېمپۇراتۇرىسى بولۇپ، كىتاب مەلۇم بىر بىلىملىك كىشىنىڭ دۆلەت دېكتاتۇرىسىدىن قېچىپ چىقىش ئەھۋالىنى فانتازىيەگە يېقىن كېلىدىغان بىر ئۇسلۇبتا تەسۋىرلەيدۇ . بۇ كىشى ئەسلىدە كىتاب كۆيدۈرىدىغان خادىم بولۇپ، كىيىن ئۆزىنىڭ قىلغانلىرىدىن نومۇس ۋە پۇشايمان قىلىدۇ ۋە كىشىلەرگە كىتابلار كۆيۈپ كېتىشتىن بۇرۇن دۇنيادىكى بارلىق قىممەتلىك بىلىملەرنى يادلىۋېلىشنى تەشەببۇس قىلىدۇ.

كىتابنىڭ باش قەھرىمانى مونتەگ ھەرخىل قىينىچىلىقلارنى بېشىدىن كەچۈرۈپ ئاخىرى ئىنسانىيەت توغرىلىق مۇھىم ھېكمەتكە ئىگە بولىدۇ: خۇددى سۇمرۇغ ھەر قېتىمدا كۆيۈپ قايتا تىرىلگەندەك ئىنسانىيەتمۇ ئۆز خاتالىقىدىن ئۆگىنىپ تۇرىدۇ، بۇنىڭ ئۈچۈن كىشىلەر ئۆزىگە قاراپ چىقىشنى بىلىشى ۋە ئۆگىنىشى كېرەك.

ئەڭ ئاخىرىدا مونتەگكە ئەگەشكەن بىر گورۇپپا كىشىلەر ئۆزىنىڭ شەھىرىگە قايتىدۇ ۋە ئۇنى قايتىدىن قۇرۇپ چىقىپ دېكتاتۇرادىن ئازاد قىلىدۇ.

كىتابنىڭ ئەڭ نۇقتىلىق مەزمۇنى: بىلىم ئىنساننى قۇتقۇزغۇچى ۋە ئازاد قىلغۇچى كۈچ!

بۇ كىتاب جورج ئورۋېلنىڭ ھايۋاناتلار قورۇقى ۋە 1984 كە ئوخشاپ كېتىدىغان خاراكتىرلىك كىتاب. ئوقۇپ چىقىشقا ئەرزىيدۇ.

تۆۋەندىكى ئۇلىنىشتىن بۇ كىتابنى چۈشۈرەلەيسىز.

تۆۋەندە بۇ كىتابنىڭ پ د ف نۇسخىسىنىڭ ئۇلانمىسى بېرىلدى، پۈتۈن نۇسخسىنى چۈشۈرۈپ ئوقۇيالايسىز.

451 فارىنخايىت


3- كىتاب

جېننى قىز

ئامېرىكا يازغۇچىسى سىيېدور جىرەيزىرنىڭ 'جېننى قىز' ناملىق رومانى

بۇ كىتابتا جېننىدىن ئىبارەت بىر قىزنىڭ سەرگۈزەشتىلىرى تەسۋىرلەنگەن، ئۇنىڭ سەل ئەگرى ـتوقايلىققا تولغان تۇرمۇشى ئارقىلىق كىتابتىكى باشقا كىشىلەر نىڭ خاراكتىرلىرى بىلەن تونۇشۇپ چىقىمىز. بۇلارنىڭ پايدىسى نېمە؟ كىتاب كىشىلەرنىڭ تۇرمۇشىنى بىزگە ھېكايە قىلىپ سۆزلەپ بېرىدۇ، ئەمما ھېچكىمگە يازغۇچىنىڭ ئۆزىنىڭ باھاسىنى سىڭدۈرمەيدۇ، ئوقۇرمەننىڭ مېڭىسىنى يۇيۇشنى مەقسەت قىلمايدۇ.

بۇ كىتابنى ئوقۇپ بولغاندىن كىيىن بىر ئىنساننىڭ يەنە بىر ئىنساننى باھالىماي تۇرۇپمۇ، راھەت بىر روھىي ھالەتتە ئۇنىڭغا يۈز بەرگەن ۋەقەلەرنى ئېيتىپ بېرەلەيدىغانلىقىنى ھېس قىلىمىز. بىزنىڭ ئەدەبىياتىمىزدا بۇنداق ئەسەرلەر يوق، چوقۇم بېرىلگەن باھالار بىزنى پىرسوناژلارنى ئاق ـ قارا، قىزىل ـ سېرىق دەپ ئايرىشقا مەجبۇرلايدۇ.

بۇ كىتاب ئۇنداق ئەمەس، 100 يىلنىڭ ئالدىدا يېزىلغان بولسىمۇ ھازىرغا قەدەر كىشىلەرنىڭ باشقىلارنىڭ ھاياتىغا قانداق قارىشى ھەققىدە مۇھىم بىر ئۇچۇرغا ئىگە قىلالايدۇ.

Book name: Jennie Gerhardt

Author: Theodore Dreiser

تۆۋەندە بۇ كىتابنىڭ پ د ف نۇسخىسىنىڭ ئۇلانمىسى بېرىلدى، پۈتۈن نۇسخسىنى چۈشۈرۈپ ئوقۇيالايسىز.

جېننى قىز




2- كىتاب

'كىتابنى قانداق ئوقۇش كېرەك


'كىتابنى قانداق ئوقۇش كېرەك؟' ئاپتورى دوكتۇر ئادلىر.

بۇ ئېنگىلىزچە كىتاب بىزگە ھەر خىل ژانىرلاردىكى كىتابلارنى قانداق قىلغاندا توغرا ئوقۇغىلى بولىدىغانلىقىنى ئۆگىتىدۇ.

بىزنىڭ قايسى تىپلىق ئوقۇغۇچى ئىكەنلىكىمىزنى ئايرىپ، ئوخشىمىغان كىتابلارنى قانداق ئوقۇيدىغانلىقىمىز توغرىسىدا چۈشەنچە بېرىدۇ.

بۇلاردىن باشقا يەنە ئېنگىلىز تىلىدىكى كېلاسسىك ئەسەرلەرنى تونۇشتۇرىدىغان بولۇپ، ھەقىقىي كىتاب ئوقۇش ھەۋىسى بار ئوقۇرمەنلەرنىڭ بىر نەچچە قېتىم ئوقۇپ چىقىشىغا ئەرزىيدۇ، خۇددى كىتابتا دېيىلگەندەك: ياخشى كىتابنى كامىدا ئۈچ قېتىم ئوقۇش كېرەك.


Adler Mortimer؛ How To Read A Book

تۆۋەندە بۇ كىتابنىڭ پ د ف نۇسخىسىنىڭ ئۇلانمىسى بېرىلدى، پۈتۈن نۇسخسىنى چۈشۈرۈپ ئوقۇيالايسىز.

كىتابنى قانداق ئوقۇش كېرەك



1- كىتاب

يارىلىنىش (زەربە يېيىش) ۋە ئەسلىگە كېلىش



'يارىلىنىش (زەربە يېيىش) ۋە ئەسلىگە كېلىش'، دوكتۇر جۇدىس خىرمەن. فىرويىدنىڭ پىسخولوگىيە ئەسەرلىرىدىن قالسىلا ئەڭ مۇھىم بولغان ئەسەر، مەيلى يارىلانغان، زەربە يېگەندىن كىيىنكى پىسخولوگىيە نەزىرىيە ئاساسلىرى بىلەن تونۇشۇپ چىقىشنى مەقسەت قىلىڭ ياكى زەربىدىن كىيىن قانداق ئەسلىگە كېلىشنى ئۈگىنىشنى نىشانلاڭ، بۇ مۇھىم ئەسەر تۇرمۇشىڭىزنى ئۆزگەرتىپ، ئۆزىڭىزنى ۋە ئەتراپىڭىزدىكى مۇھىتنى بىلىشتە زور رول ئوينايدۇ.


‘Trauma and Recovery’ by Judith Herman

تۆۋەندە بۇ كىتابنىڭ پ د ف نۇسخىسىنىڭ ئۇلانمىسى بېرىلدى، پۈتۈن نۇسخسىنى چۈشۈرۈپ ئوقۇيالايسىز.

يارىلىنىش (زەربە يېيىش) ۋە ئەسلىگە كېلىش